Hozirgi kunda har qaysi davlat koronavirus pandemiyasiga qarshi o'zi bilganicha kurashmoqda. Indoneziyaning Yava orolidagi huquqni muhofaza qilish tashkiloti vakillari ham koronavirusni yo'q qilishda o'z usullarini tanlashibdi. Lekin bu usul anchagina xavfli va qaltis. Xullas, ular karantin va o'z-o'zini izolyatsiya qilish talablarini buzganlarga qarshi original kurash usulini tanlashdi. Qoidabuzarlarni tashlandiq, ichkarisida arvohlar kezuvchi imoratlarga qamab qo'yishmoqda. — Koronavirusdan qo'rqmadingmi, — deyishmoqda ularga. — Endi arvoh bilan ham yashab ko'rgin-chi, qanday bo'larkin!.. Qoidabuzarlardan biri Genri Susanto ismli erkakni ham bir necha kunga o'sha tashlandiq bino ichkarisiga qamab qo'yishgandi. Qamagani bilan korchalonlar ovqatini vaqtida beradi. Xullas, yeyish-ichishdan kamlik ko'rmaydi. Biroq Genri Susanto endi hech qachon karantin qoidasini buzmaslikka ont ichibdi. U arvohlar ta'qibidan sal bo'lmasa o'layozibdi. Lekin batafsil hikoya qilishga yuragi betlamadi. Faqat o'sha tashlandiq uy ichida bir necha kun yashab tavbasiga tayanganini yig'lab aytib berdi xolos. Hindistonda ham karantin talabini buzganlarga alohida jazo chorasi qo'llanmoqda. Ularni oldin 100 marta o'tirib turishga majbur etishadi. Bu ham ish bermasa, charm tayoqlar bilan savalashadi. Hindistonning Tiruppur shahrida esa politsiyachilar uch nafar karantin talabini buzgan fuqaroni qo'lga oldi. Bilasizmi ularga qanday jazo berishdi. Yo'q, ularni charm tayoq bilan savalashmadi, 100 marta o'tirib turishga majburlashmadi. Sal narida «Tez yordam» mashinasi turgan va salonida koronavirus yuqtirgan bemor o'tirgan ekan. Xuddi o'sha bemor bilan birga mashinaga qamab qo'yishdi. Pokistonda ham politsiya xodimlari karantin qoidabuzarlariga qarshi alohida jazo o'ylab topishgan. Ularni uzoq masofaga emaklab borishga majbur etishmoqda