Не удается получить доступ к сайту

- Boshqa mahallada yashaydigan yigit bilan bir-birimizga ko'ngil qo'ygan edik. Ammo kollejni bitirishim bilan ota-onam meni tanishlarining o'g'liga majburlab uzatdi. Boshqa yigitni sevishimni aytganimda, na onam, na dadam va na akalarim"Bu bechorada ham ko'ngil bor, axir", deya so'zlarimga quloq solishdi.

Aksincha,"U yigitning oilasi yaxshi emas, dadasi ko'p ichadi. Akasi qimorboz", deya hammalari bir ovozdan qarshi chiqdi. To'ydan oldin bir marta uydagilardan yashirincha ko'ngil qo'ygan yigitim bilan uchrashdim. Bechora juda xafa edi. Xayrlashayotganimizda"Unutma, mendek seni hech kim sevolmaydi", dedi. Yig'lab yubordim.

To'y o'tdi. Erim bilan ko'ngil qo'yib turmush qurmaganimiz uchunmi bir-birimizga befarqmiz, hayot shu ekan, deb shunchaki yashayapmiz, xolos. Lekin hamon uni unutolmay yashayapman. U to'g'ri aytgan ekan. Haqiqatan ham, endi meni hech kim uningdek sevolmas ekan, afsus. Ota-ona roziligi deb muhabbatimni yo'qotdim. Uni eslaganimda uydan bosh olib ketgim keladi. Yoki shunday qilsammikin, nima deysiz?

Dilnoza
Fag'ona viloyati

- Bu xato ekanligini ich-ichingizdan o'zingiz ham his qilib turibsiz. To'g'ri, haqiqiy muhabbat uchun kurashsa arziydi. Lekin siz allaqachon maydonni tashlab ketgan odamsiz. Endi ming chiransangiz-da, orqaga qaytolmaysiz. Agar shunday qilganingizda ham dog'tushgan muhabbatingiz bilan uzoqqa borolmaysiz. Inson o'z tanlagani bilan baxtli bo'lishga ko'zi yetsa, uni hech narsa to'xtatib qololmaydi. Aksincha, har qanday to'siqlarni yengib o'tishga o'zida mardonavor kuch topadi. Nima qilish lozim bo'lsa, to'ydan oldin bo'lishi kerak edi. Endi vaqt g'ildiragini ortga qaytarolmaysiz. Shu bois hozirgi hayotingizni gulzorga aylantirishga harakat qiling."Endi hech kim sevolmaydi uningdek"deb o'tirsangiz, hozirgi baxtingizni ham boy berib qo'yasiz. Eringiz sevmasa, sevdiring, e'tibor bermasa, diqqatini tortishga harakat qiling. Axir ezgulik yo'lida qilingan har qanday harakat bir kun natija berishi aniq. Siz qalbingizda sovuq muhit yaratib olganingiz uchun ham eringiz siz tomon talpinmayotgandir, balki. Maslahatimiz, o'tkinchi sevgini unutishga harakat qiling, bor mehringizni oilangizga qarating.